Житие Александра Невского

Скажемъ мужество и житие его. О господЂ нашемъ Исусе Христе сыне божия и язъ худый и грЂшный и недостойный начинаю писати житие великаго князя Александра Ярославичя, внука Всеволожа. Понеже слышахъ отъ отецъ своихъ и самовидецъ есмъ возрасту его и радъ быхъ и исповЂдалъ святое житие и честное и славное, но якожъ приточникъ рече, во злохитру душу не внидеть премудрость, на высокихъ бо краехъ есть, посреди же стезъ стояше, при вратехъ сильныхъ присЂдитъ. Аще и грубъ есми умомъ, молитвою святыя госпожи богородицы и поспешенимъ святаго князя Александра Ярославичя начатъ положюсъ. Той бЂ князь Александръ Ярославичь богомъ роженъ отъ отца благочестива и нищелюбца, паче жъ кротка, великаго князя Ярослава, отъ матери благочестивыя Феодосеи, якожъ рече Исаия пророкъ: «Тако глаголеть господь, князи язъ учиню, священни бо суть, азъ ввожю, во истину, безъ божиа бо повелЂниа не бЂ княжениа его». Но княжениа князя Александра Ярославичя богомъ благословенно. Но возрастъ его паче инЂхъ человЂкъ, а гласъ его, яко труба въ народе, а лице его, яко лице Иосифа, иже бЂ поставилъ его егупетски царь втораго царя во Египте. Сила жъ бЂ ему часть бЂ от силы Самсоня, и премудрость бЂ ему Соломоня, далъ богъ храброство же ему царя римскаго Еусписиана, сына Нерона царя, иже пленилъ есть землю ИюдЂйскую. Иногда ополчився гражане Атупату хотя приступити, шедше гражане победиша полкъ его, и оста единъ и взя си градъ ихъ до вратъ градныхъ и посмЂяся дружинЂ своей и укори я укоромъ и рече: «Оставите мя единаго». Тако жъ князь Александръ Ярославичь побЂждаа непобЂдимъ. И се нЂкто отъ западныя страны, ижъ нарицаютца слуги божиа, и отъ тЂхъ приидоша, хотя видЂти дивный возрастъ его, якожъ древле царица южская приходила къ Соломоню царю, хотя слышати премудрость его, яко сей, именемъ АндрЂйашь, видЂвъ князя Александра Ярославичя, и возвратися ко своимъ и рече: «Прошедъ страны и языки, не видЂхъ таковаго ни во цари царя, ни во князЂхъ князя». И се слышавъ краль части Римскиа, отъ полунощныя страны 1 таковое мужество князя Александра Ярославичя и рече: «Пойду, попленю землю Александрову». И собра силу велику и наполни корабля многи полковъ своихъ и поиде въ силе велице, пыхая духомъ ратнымъ. И преиде реку Неву, шатаяся безумиемъ, посла послы разгордЂвся ко князю Александру Ярославичю въ Новъ городъ въ Великий и рече: «Аще можеши ми противитися, уже есмь здЂ, попленю землю твою». Князь же Александръ Ярославичь слышавъ словеса сихъ и разгорЂвся сердцемъ, вниде въ церковь святыя СофЂя и паде на колЂно предъ олтаремъ и нача молитися со слезами богу и рече: «Боже хвалный и праведный, богъ крЂпки и велики, боже вЂчный и сотворивый небо и землю, море и реки, и постави прЂдЂлы языкомъ, и повелЂ жити, не преступая въ чюжая части земли». И возприимъ псаломьскую пЂснь и рече: «Суди, господи, и разсуди прю мою, суди, господи, обидящимъ мя и возбрани борющихся со мною, приими оружие и щитъ и стани въ помощь мнЂ».

И скончавъ молитву, воставъ, поклонися архиепископу. Архиепископъ же Спиридонъ благослови его и отпусти. Александръ же Ярославичь идя ис церкви, утирая слезы. И нача крепити дружину свою и рече: «Не въ силе богъ, но въ правде. И помянемъ пЂсньсловца Давида: сии въ оружьия, сии на конехъ, мы жъ во имя господа бога нашего призовемъ, ти спяти быша и падоша». И поиде на ня въ мале дружинЂ, не сождавъся со многою силою своею, уповая на святую троицу. Жалостно слышати, яко отецъ его Ярославъ честный, великий, не бЂ вЂдалъ таковаго востаниа на сына своего милаго великаго князя Александра Ярославичя, ни оному бысть вЂсть послати ко отцу во градъ Киевъ, уже бЂша приближися ратнии, и мнози ноугородцы не совокупилися бяху, понежъ ускори князь велики пойти. И прииде на нихъ въ день возкресениа на память святыхъ отецъ 600 и 30 бывшаго собора въ Халкидоне и на память святаго Кирика и Улиты и святаго князя Владимера, крестившаго землю Рускую. ИмЂяше жъ вЂру велику ко святымъ мученикомъ Борису и ГлЂбу. БЂ некто мужъ, старЂйшина земли Ижерской 2 именемъ Беглусичь; поручена жъ бысть ему стража утреничная морская, восприять же святое крещение и живяше посреди рода своего, погана суща, наречено бысть имя ему во святомъ крещении Филипъ. И живяше богоугодно, въ среду и въ пятокъ пребываше во алчьбЂ. И сподоби его богъ видЂти видЂние страшно, скажемъ же силу ихъ вкратце. И увидЂ силу ратныхъ, идуще противъ князя Александра Ярославичя, да скажетъ ему силу варяжскую и станы ихъ. Стрегуще ему обоя пути, и пребысть всю нощь во бдЂнии, якожъ солнце восходи, и услышавъ шумъ страшенъ по морю, и видЂ насадъ единъ гребущь по морю, а посреди насада Борисъ и ГлЂбъ, стояща во одежахъ червленахъ, быста руки своя держаща на рЂмехъ. И гребцы сЂдяху, аки мглою одЂни. И рече Борисъ ГлЂбу: «Брате ГлЂбе, вели грести, да поможемъ сроднику своему великому князю Александру Ярославичю». ВидЂвше Пелгусиа таково видЂние и слыша гласъ таковъ отъ святую мученику, стояше трепетенъ. И отиде насадъ отъ очю его, и поиде скоро князь Александръ Ярославичь. Пелгусиа же видЂ его радостныма очима и повЂда великому князю единому видЂниа. Князь же рече ему: «Сего не повЂдай никому жъ». И подщався на нихъ наЂхати въ 6 часъ дни, и бысть сЂча великая надъ римляны, и изби множество бесчисленое отъ нихъ и самому королеви возложи печать на лицы острымъ своимъ копиемъ. ЗдЂ же въ полку в Олексанъдро†явишася 6 мужей храбрыхъ и силныхъ и мужествовавъ съ имъ крЂпко. Гаврило единъ, именемъ Алексичь. Сей наЂхавше на шняку видЂвъ королевичь мчащше подъ руце, вьзъЂхавъ по дозсьцЂ до самого короля, и по нейже досцЂ возхожаху, и востекоша предъ нимъ, и паки обращеся и свергоша его з доски и съ конемъ въ море, божиею благодатию оттуду изыде невреженъ, и паки наЂхавъ, бися съ самимъ воеводою крЂпко среди полку.

Другий же новогородецъ, именемъ Збыславъ Якуновичь. Сей наЂхавъ многажды бьяшася единымъ топоркомъ, не имЂяша страха въ сердци своемъ, и паде нЂколико отъ топорка его. Подивишася князь Александръ Ярославичь силе его и храбрости его. Третий же Яковъ, родомъ полочянинъ, ловчей бысть у князя. Сей наЂхавъ на полкъ съ мечемъ и мужествовалъ и похвали его князь. Четвертый же новогородецъ, именемъ Миша. Сей пЂшт з дружиною своею погуби три корабли римлянъ. Пятый отъ молодыхъ его, именемъ Сава. Сей наЂхавъ шатеръ королевъ великий златоверхий и подсече столпъ шатерный. Полцы жъ великаго князя Александра Ярославичя видЂша падениа шатра, возрадовашася о падение шатра того. Шестый же отъ слугъ его, именемъ Ратмиръ. Сей бысть пЂшь, и оступиша его мнози, и отъ многихъ ранъ паде и скончася. Сии же вся слышавъ отъ господина своего князя Александра Ярославичя и отъ иныхъ же — въ то время обретошася въ той же сЂчи. Бысть же въ то время чюдо дивно, якоже во древняя дни при ЕзикЂи цари, егда прииде Сенахиримъ, асирийский царь, на Иерусалимъ, хотя пленити святый градъ Ерусолимъ, и внезапу изыйде ангилъ господень и изби отъ полку асирийска 100 тысящь, 80 тысящь 600. И восташа заутро, и обретошася трупие мертва. Такожде и при побЂде и князя Александра Ярославичя, егда победи корабля, обонъ полъ реки Ижеры, идЂже не бЂ проходно полкомъ Александровымъ, здЂ же обретошася вся трупие мертва отъ арханьила божия, и останокъ побеже, а трупие мертвых своихъ наметаша корабля и потопиша въ мори. Князь же Александръ Ярославичь возвратися съ побЂды, хваля бога и славя своего творца, отца и сына и святаго духа, и нынЂ и присно и во вЂки вЂкомъ. Аминь.

Во второе жъ лЂто по возвращение ис побЂды князя Александра Ярославичя прийдоша отъ западныя страны и возгради градъ 1 во отечествии Александрове. Великий жъ князь Александръ Ярославичь изыде на ня вскорЂ, изверже градъ изо основаниа, а самихъ избиша, иныхъ съ собою приведе, а иныхъ помилова и отпусти, бЂ бо милостивъ паче мЂры. По побЂде же Александрове, егда победи короля, въ третии жъ годъ, въ зимнее время, пойде на землю Немецкую съ силе велице, да не хвалятся, рекуще: «Укоримъ словенский языкъ». Уже бо взятъ градъ Псковъ, и тиуни у нихъ посажени. ТЂхъ же князь великий Александръ Ярославичь изима и градъ Псковъ свобода отъ плЂна, и землю ихъ повоева и позже и полона взя безъ числа, иныхъ посече, а инии во градЂ совокупишаяся и рЂша: «Победимъ князя Александра Ярославичя и имемъ его рукама». Егда приближишася ратнии, и почюша стражи великаго князя Александра Ярославичя. Князь же Александръ ополчився пойде противу ратнымъ, и наступиша море Чюдское. Бысть же обоихъ множество. Отецъ же его Ярославъ послалъ бЂ ему на помощь брата меншаго князя АнъдрЂя во множе дружинЂ. Тако и у князя Александра множество храбрыхъ мужъ, якожъ древле у царя Давида, крЂпцыи, сильнии, тако жъ и мужи Александровы исполнишася духа ратна: бяху сердца ихъ, аки лвомъ, и рекоша: «О княже нашь честный, драгий, нынЂ приспЂ время намъ положити главы своя за тя». Князь же Александръ Ярославичь воздЂвъ руцЂ на небо и рече: «Суди, господи, и разсуди прю мою, отъ языка велерЂчива избави мя, помози ми, господи, якоже МоисЂю на Амалика древле и прадеду моему Ярославу на акаянного Святополка». БЂ же тогда день суботный, восходящу солнце, сступишася обои, и бысть сЂча зла и трускъ отъ копей и ломление и звукъ отъ мечнаго сечениа, якожь морю мерзшу двигнутися; не бЂ видЂти леду, покрылося бяше кровию. Се же слышавъ отъ самовидца, рече: видЂхомъ полкъ божий на воздусе, пришедши на помощь Александру Ярославичю. И побЂди я помощью божиею, и въдаша ратнии плещи своа. Они же сЂчахуть и гонящи, яко по яйеру, не бЂ имъ камо убЂжати. ЗдЂ же богъ прослави великаго князя Александра Ярославичя предъ всЂми полки, яко Исуса Навгина во Ерихоне. А ижъ рекъ: «Имамъ рукама великаго князя Александра Ярославичя», сего дастъ ему богъ въ руцЂ его. И не обретеся никто жъ, противяся ему во брани. И возвратився князь Александръ Ярославичь съ победы съ славою великою. Бысть много множество полону въ полку его, ведяху подлЂ коний, ижъ именуетца рыдели.

Егда прииде князь Александръ Ярославичь ко граду Пскову, и сретоша его со кресты игумены и попове въ ризахъ, народъ многъ предъ градомъ, подавающе хвалу богови, поюще пЂснь и славу государю, великому князю Александру Ярославичю: «Пособивый, господи, кроткому Давиду победити иноплеменники и вЂрному князю нашему Александру оружиемъ крестнымъ свободити градъ Псковъ отъ иноязычныхъ рукою Александровою». О невЂгласи плесковичи, аще забудете князя Александра и мужи новгородцовъ и до правнучатъ Александровыхъ, уподобитеся жыдовомъ, ихъ же господь препитЂ въ пустыни манною и крастельми печеными, сихъ всЂхъ забыша бога своего, изведшаго ихъ отъ работы изъ Египта. И начаша слышати имя великаго князя Александра Ярославичя по всЂмъ странамъ и до моря Египетского и до горъ Аравитскихъ обону страну Варяжьскаго и до Рима.

Въ то время умножися языкъ литовьски, и начаша пакостити во области Александровы. Ездя нача избивати. Единою жъ случися ему выехати и поби 7 полковъ ратныхъ и множество князей и воеводъ изби, овии рукама изима; слугы же его, ругающеся, вязаху я къ хвостомъ коний своихъ.

И начаша боятися имени его. Въста въ то время нЂкто царь силенъ на восточной странЂ, и покори ему богъ многи языки и отъ востока и до запада. Той же слышавъ князя Александра Ярославичя храбра и славна, и посла къ нему послы рекуще: «Александро, веси ли, богъ покори мнЂ многия языки, ты ли единъ не хощеши покоритися силе моей, но аще хощеши съблюсти землю свою, то скоро прииде ко мнЂ и узриши честь царьства моего». Князь же Александръ Ярославичь, по умертвии отца своего, прииде въ Володимеръ въ силе велице, и бысть грозенъ приЂздъ его. Проиде вЂсть до усть Волги, и начаша жены моявидскиа полошати дЂти своя, рекуще: «Ђдетъ князь Александръ Ярославичь». Здумавъ же великий князь Александръ Ярославичь, и благослови его Кирилъ епискупъ, поиде къ цареви. И видЂвь его царь Батый и подивися и рече велможамъ своимъ: «Во истину ми повЂдаша, нЂсть, подобна ему князя во отечествии его». И отпусти его съ великою честью.

Потомъ же царь Батый разгнЂвася на брата его на меншаго, на князя ОндрЂя, и посла на него воеводу своего Невруя, и повоева землю Суждальскую. По пленении жъ Невруеви князь велики Александръ Ярославичь церькви воздвигнувъ и градъ исполнивъ и люди разпуженныя собра въ домы своя. О таковыхъ Исайя пророкъ рече: «Князь благъ во странахъ тЂхъ, увЂтливъ, кротокъ, смиренъ, по образу божию есть, не избираеть богатества, не зря кро†праведничи, сиротЂ и вдовице въ правду судя, милостийлюбецъ, благъ домочадцомъ своимъ и внешнимъ странамъ, сиротамъ кормитель, богомоленъ, ангеломъ любителю, человЂкомъ щедрЂ ущедряетъ, показуетъ на мире милость свою. Распространи богъ землю его богатествомъ и славою и должи богъ лЂто его».

Иногда же приидоша послы отъ папы изъ великаго Рима, глагола князю Александру Ярославичю: «Папа рече, слышахомъ тя князя честна и дивна, и земля твоя славна и велика. Сего ради послахъ къ тебЂ отъ 12 кардилуану д†хитрЂйшаа — Гаадада и Гемондада, послушавши учения ею о законЂ божий». Великий жъ князь Александръ Ярославичь здума съ хитрецы своими и восписа къ нему, рекъ: «Отъ Адама до потопа и до разделения языкъ и до начала Аврама, отъ Авраама и до произытиа Иизраиля сквозЂ Чермное море, отъ исхода сыновъ Иизраилевъ до умертвия Давида царя, отъ начала царства Соломаня до Августа и до рожества Христова, до страсти и воскресениа, отъ воскресениа и на небеса вшествия и до царьства Констянтина новаго, до перваго собора и до седьмаго, си вся добре свЂдаемъ, а отъ васъ учения не приимаемъ». Они же возвратишася восвояси.

Великому жъ князю Александру Ярославичю умножися дни житиа его. БЂ иерЂилюбецъ и мнихолюбецъ, митрополита жь епископы чтяше аки самого творца. БЂ бо тогда нужда велика отъ поганыхъ веляху людемъ съ собою воинствовати. Великий же князь Александръ Ярославичь пойде къ цареви, дабы отмолилъ люди оть бЂды, а брата своего меншаго Ярослава и сына своего Дмитрея посла съ новогородцы на западный страны и вся полки свои съ ними отпусти. Пойде жъ Ярославъ съ сыновцемъ своимъ въ силе велице и плениша градъ Юрьевъ Немецкий и возвратишася восвояси со многимъ полономъ и съ великою честью. Великий жъ князь Александръ Ярославичь взыйде отъ иноплеменникъ до Нова города до Нижнего и ту пребы дни мало здравъ, дошедъ Городца и разболЂся. О горе тебЂ, бЂдный человЂче, како можеши написати кончину господина своего, како не испадета ти зЂницу со слезами вкупЂ! Како ли не разседеся сердце отъ горкиа тугы! Отца бо человЂкъ можетъ забыти, а добраго государя не можетъ забыти, аще бы живъ съ нимъ во гробЂ влЂзлъ.

Великий же князь Александръ Ярославичь ревновавъ по господЂ бозЂ своемъ крЂпко, оставя земное царьство и желая небеснаго царьствиа, возприять ангилский образъ мнишескаго житиа; аще сподоби его богъ больший чинъ восприяти — скиму. Тако господеви духъ предастъ съ миромъ, скончася мЂсяца ноября въ 14 день на память святаго апостола Филиппа. Митрополитъ Кирилъъ 1 глаголетъ къ людемъ: «Чада моя, разумЂйте, яко уже зайде солнце земли Суждальскыа». Игумени жъ и попове и дьяконе, черноризцы, богатии и нищи и вси людие мнози вопияху, глаголюще: «Уже погибаемъ». Святое же тЂло его понесоша къ Володимерю. Митрополитъ же съ чиномъ вкупе церьковнымъ, князи и бояре и весь народъ, мали и велицы, сретоша его въ Боголюбове со свещами и съ кадилы. Народъ же отъ множества угнетахуся, хотяще приступити честнЂмъ одрЂ тЂла его. Бысть же плачь великъ зело и кричание много, яко николи же тако, но токмо яко земли потрястися. Бысть же тогда чюдо дивно, памяти достойно. По скончании святыя службы надъ честнымъ тЂломъ его приступи Кирилъ Митрополитъ, хотя разнути руку его, вложити грамоту духовную. Он же самъ, яко живъ, распростре руку и приятъ грамоту отъ руки митрополита. И бысть страхъ и ужасть велика зело на всЂхъ. И положено бысть честное тЂло его въ Рожест†святей богородицы, мЂсяца ноября въ 23 день, на память святаго АнфилофЂя епископа, со псалмы и пЂсньми, славяще отца и сына и святаго духа, святую троицу, нынЂ и присно и въ вЂки вЂкомъ.

Аминь.